پاوہ شہر کے اہل سنت امام جمعہ ماموستا ملا قادر قادری کی یادداشتیں

ماموستا 61

مصنف: علی رستمی

ترجمہ: ضمیر علی رضوی
ویرائش: یوشع ظفر حیاتی

2026-4-14

شاہی حکومت کا خاتمہ اور کُردستان کی لڑائیوں کا آغاز

پولیس ہیڈکوارٹر اور جینڈرمیری کے زوال کے ساتھ ہی پاوہ شہر میں شاہی نظام کا تختہ الٹ گیا اور شہر کا نظام ساواک کی عمارت میں مختلف طبقوں سے تعلق رکھنے والے دس افراد پر مشتمل ’’پاوہ شہر انتظامی کونسل‘‘ نامی ایک کونسل نے سنبھال لیا۔ چند دن بعد اس کونسل کا نام بدل کر ’انقلاب اسلامی کمیٹی‘[1] رکھ دیا گیا اور یہ کمیٹی تمام امور کی فیصلہ ساز بن گئی۔

کچھ لوگوں نے شہر میں موجود انقلابی ماحول سے غلط فائدہ اٹھایا۔ اس طرح سے کہ تمام سرحدی چیک پوسٹوں کو غیر مسلح کردیا گیا اور اسلحہ، عوام کے ہاتھوں میں آگیا۔ سوائے ایک چیک پوسٹ کے جو پاوہ کی جمعیت شیر و خورشید سرخ کی عمارت میں واقع تھی اور اس میں تقریباً تیس لوگ موجود تھے، تمام چیک پوسٹوں کو لوٹ لیا گیا تھا اور اسلحہ عوام کے ہاتھوں میں آچکا تھا۔ اسلحے کا بازار گرم تھا اور بہت سے مرد اور یہاں تک کہ خواتین بھی مسلح تھے۔ جس کے پاس اسلحہ نہیں ہوتا تھا وہ خود کو مرد نہیں سمجھتا تھا۔

پاوہ اور اورامانات کا علاقہ، قبائلی علاقے میں تبدیل ہوچکا تھا۔ اس لیے اس علاقے پر کسی بھی ملٹری یا پولیس فورس کا کنٹرول نہیں تھا۔ نوسود کے گرد و نواح کی چیک پوسٹیں اہلکاروں اور سرحدی محافظوں سے خالی تھیں اور جو کوئی بھی بغداد سے تہران جانا چاہتا تو اسے روکنے والا کوئی نہیں تھا۔

انقلاب اسلامی کی کامیابی کے بعد عوام میں مدرسۂ قرآن کی مقبولیت بڑھ گئی اور اس کی وجہ اس مدرسے کے ہر ایک رکن کی صداقت تھی۔ یہ مقبولیت کچھ لوگوں کے بغض اور کینے کا باعث بنی۔ احمد مفتی زادہ صاحب، سنندج میں مدرسۂ قرآن چلا رہے تھے اور بہت فعال تھے۔ میں پہلے سے ان سے آشنا تھا اور میں نے مہاباد اور بوکان میں کئی بار ان کی خطابت میں شرکت کی تھی۔ اس کے علاوہ میں نے انقلاب سے پہلے، ان کی تقریروں کی بہت سے کیسٹیں بھی سنی ہوئی تھیں جو زیادہ تر تحریک بہائیت کے خلاف تھیں۔ ادارے کو مضبوط بنانے، ضروری ہدایات اور سہولیات حاصل کرنے کے لیے ہم نے پاوہ کے مدرسۂ قرآن کو سنندج اور جناب احمد صاحب سے منسلک کردیا۔ جناب احمد صاحب اور ان کے ساتھیوں کے ادارے کا نام بھی مدرسۂ قرآن تھا اور دونوں ادارے پہلے سے کسی ہم آہنگی کے بغیر ایک ہی نام سے سرگرمیاں انجام دے رہے تھے۔

سنندج میں انقلاب کی کامیابی کے ابتدائی دنوں میں ہی کچھ حادثات رونما ہوئے تھے۔ کُردستان ڈیموکریٹک پارٹی جیسی پرانی اور مضبوط تنظیم سے قطع نظر، نئی سیاسی اور کمیونسٹ پارٹیوں کی بنیاد رکھی گئی جنہوں نے کُرد علاقوں کو آپس میں بانٹ لیا۔ تنظیمی حالات و واقعات سے ناآشنا لوگوں کے اس طرح ٹکڑوں میں بٹ جانے کے باعث کردستان میں ایک بحران پیدا ہوگیا۔ کوملہ[2] جیسی پارٹیوں نے اس نوخیز نظام پر تنقید شروع کردی تھی کہ جو ابھی صحیح سے تشکیل بھی نہیں پایا تھا۔ ان لوگوں کی اس نظام کی مخالفت اتنی تیزی سے بڑھی کہ ایک مہینے سے بھی کم وقت کے عرصے میں وہ  تنقیدی اور سیاسی مرحلے سے نکل کر، ہتھیار اٹھا کر عسکری مرحلے میں داخل ہوگئے اور انہوں نے حکومت اسلامی کے خلاف صف آرائی کرلی۔ یہاں تک کہ کچھ شہروں میں چیک پوسٹوں پر حملہ کیا اور ان کا اسلحہ اور گولہ بارود لوٹ لیا۔ اس دوران، عزالدین حسینی اور ڈاکٹر عبدالرحمن قاسملو[3] جیسے افراد جنہیں کردستان کے عوام زیادہ نہیں جانتے تھے، جمہوری اسلامی کی مخالفت اور میڈیا کی تشہیر کے باعث مشہور ہوگئے تھے، لیکن اس کے باوجود ان لوگوں کی شہرت، احمد مفتی زادہ صاحب جیسی مذہبی شخصیات کے مقابلے میں بہت کم تھی۔ وہ اعلیٰ علمی صلاحیت کے علاوہ، شاہی حکومت کا مقابلہ کرنے والوں میں شامل تھے اور ان کے بہت سے شیعہ انقلابیوں کے ساتھ اچھے اور مخلصانہ تعلقات تھے۔ یہ تعلقات جمہوری اسلامی سے ان کے ایک طرح کے لگاو کا باعث بن گئے تھے۔ مفتی زادہ صاحب کے امام خمینی اور آیت اللہ منتظری، آیت اللہ طالقانی، آیت اللہ شریعتمداری جیسے بہت سے علماء اور انجینیئر بازرگان[4] جیسی سیاسی شخصیات سے بہت قریبی تعلقات تھے اور شاید یہ فکری تعلق ان کی شیخ عزالدین حسینی اور عبدالرحمن قاسملو جیسے افراد سے دوری کا باعث بن چکا تھا۔

شیخ عزالدین کا کوئی انقلابی ماضی نہیں تھا اور وہ صرف مہاباد کے امام جمعہ تھے جو ایک طرح سے شاہ کے مقرر کردہ کی حیثیت سے پہچانے جاتے تھے۔ دوسری طرف ان کے بھائی سید جلال حسینی صاحب، ایک قابل اور غیرت مند عالم دین تھے جنہوں نے پہلوی حکومت کے خلاف واضح اور انقلابی موقف اختیار کر رکھا تھا۔ وہ قریب ایک سال تک میرے استاد رہ چکے تھے اور میں ان کے انقلابی جذبے سے واقف تھا اور انقلاب کے بعد ان کی خاموشی پر مجھے تعجب ہوتا تھا۔ اس کے برعکس میں دیکھ رہا تھا کہ ان کے بھائی شیخ عزالدین مشہور ہو رہے ہیں اور خود ان کے بقول وہ کُردوں کی قیادت سنبھالنا چاہتے ہیں۔ جن دنوں عزالدین صاحب خاموش تھے اور جمعے کے خطبوں میں شاہ کے لیے دعائیں کرتے تھے، ان کے بھائی سید جلال صاحب، بانہ کی جامع مسجد میں علیٰ الاعلان شاہ کو طاغوتی قرار دیتے تھے اور اسے اس نام سے مخاطب کرتے تھے۔

سن 1978 میں بانہ کے حجاج کی روانگی کی محفل میں، جب ایک مولانا نے حجاج سے گزارش کی کہ وہ، حج کی ادائیگی کے دوران ایران کی سلامتی اور شہنشاہ آریامہر(شاہ) کے طول عمر کے لیے دعا کریں، تو وہ شدید غصے ہوئے اور کہنے لگے: ’’بہائیو! آپ وہاں توحید کا اعلان کرنے جارہے ہیں، طاغوت سے تجدید بیعت کرنے نہیں۔ آپ لوگ وہاں جائیں تاکہ آپ طاغوت سے چھٹکارا پاسکیں۔‘‘

ایک دن میں نے ہمدردی میں ان سے کہا: ’’ماموستا مجھے آپ کے سخت رویے پر آپ کی فکر ہوتی ہے۔‘‘

انہوں نے کہا: ’’ملا قادر، یہ باتیں میری دینی ذمہ داری ہیں۔‘‘ اس کے بعد انہوں نے بانہ کے ایک مولانا کا نام لیا جو ساواک کے لیے کام کرتا تھا اور کہنے لگے: ’’کل قیامت کے دن تم دیکھو گے کہ خدا، مجھ سے اور اس سے کس طرح پیش آئے گا۔ جان لو کہ میرا غصہ اور سخت رویہ، قیامت کے دن کے لیے ہے، آج کے لیے نہیں۔‘‘