پاوہ شہر کے اہل سنت امام جمعہ ماموستا ملا قادر قادری کی یادداشتیں

ماموستا 62

مصنف: علی رستمی

ترجمہ: ضمیر علی رضوی
ویرائش: یوشع ظفر حیاتی

2026-4-20

جمعیت طرفداران حکومت قرآن

انقلاب اسلامی کی کامیابی کو ایک ماہ سے بھی کم وقت ہوا تھا۔ علمانی، ڈیموکریٹک اور کمیونسٹ یونین پارٹیاں، ’دہقانوں کا دفاع اور کُرد قوم کا دفاع‘ جیسے پرفیب نعروں اور ناموں کے ساتھ ظہور پذیر ہوئیں۔ ان کے رنگ برنگی جھنڈے اور نشانات تھے۔ ہر محلے میں ان لوگوں نے کچھ عمارتیں لے لی تھیں اور سرگرمیوں میں مشغول ہوگئے تھے۔ وہ لوگ انقلابی افراد کو دھمکیاں دیتے تھے؛ لیکن ان دھمکیوں کے جواب میں ہم نے مدرسۂ قرآن کی سرگرمیوں کو وسعت دے دی تھی۔ چونکہ ہمیں جوانوں کے بائیں بازو کے گروہوں بالخصوص الحادی گروہوں کے جال میں پھنسنے کا خطرہ محسوس ہورہا تھا، اس لیے ہم نے 6 مارچ 1979، یعنی انقلاب کی کامیابی کے پہلے ہی مہینے میں ’’جمعیت طرفداران حکومت قرآن‘‘ نامی ایک آرگنائزیشن قائم کی اور اس کے مقاصد کو بیان کرکے ہم نے رکنیت سازی شروع کردی[1]۔ اس جمعیت کے اراکین، وہی مدرسۂ قرآن کے اراکین تھے۔ ہماری آرگنائزیشن کی سرگرمیوں کے آغاز کے ساتھ ہی کُردستان ڈیموکریٹک پارٹی اور اس کے کارندوں نے ہمارے خلاف سرگرمیاں انجام دینا شروع کردیں، لیکن انہیں ان سرگرمیوں میں کوئی کامیابی حاصل نہیں ہوئی۔ پاوہ میں ڈیموکریٹک پارٹی کی ناکامی کی ایک وجہ، عوامی ہونے کے تمام تر دعووں کے باوجود، ان کا پاوہ میں مدرسۂ قرآن سے مقابلہ کرنا تھا اور اس بار جب ان لوگوں نے اسی مدرسۂ قرآن کے شاگردوں سے ’’جمعیت طرفداران حکومت قرآن‘‘ کا نام سنا تو وہ لوگ اس آرگنائزیشن سے مقابلے کے میدان میں کود پڑے اور جوانوں کو اس کی رکنیت اختیار کرنے سے روکنے لگے۔ جو کوئی بھی اس جمعیت کی رکنیت اختیار کرنے کا ارادہ کرتا تھا تو وہ لوگ اس کی راہ میں رکاوٹ ڈال دیتے تھے اور وہ اس بات سے بخوبی واقف تھے کہ جو کوئی بھی جمعیت قرآن کا حصہ بنے گا، اس کے قرآنی افکار اسے ڈیموکریٹک پارٹی اور اس سے بھی بدتر بائیں بازو کے گروہوں اور تنظیموں میں شامل نہیں ہونے دیں گے۔ انہوں نے شہر میں جگہ جگہ دیواروں پر لکھ دیا تھا کہ ’’عنقریب ڈیموکریٹک پارٹی پاوہ کے دفتر کا افتتاح کیا جائے گا‘‘ لیکن کئی ہفتوں تک وہ لوگ دفتر کے افتتاح اور سرگرمیاں شروع کرنے میں کامیاب نہ ہوسکے؛ کیونکہ وہ، مذہبی افراد کو اپنے خلاف دیکھ رہے تھے جو قرآن کا عَلم لیے میدان میں اتر چکے تھے۔ وہ لوگ جہاں کا بھی رخ کرتے تھے ان کے لیے دروازے بند ہوتے تھے۔ کچھ عرصے بعد انہوں نے پاوہ میں ’خلق کُرد کا دفتر‘ قائم کیا اور وہ بھی لوگوں کو اپنی جانب راغب کرنے میں مؤثر ثابت نہیں ہوا۔ تھوڑا غور کرنے پر ہم نے دیکھا کہ کچھ معین اور گنتی کے لوگ ہیں جن کا ان گروہوں کی تشکیل میں مشترکہ طور پر کردار ہے۔ پاوہ میں موجود تنظیمیں جن کے حامیوں کی تعداد انگلیوں پر گنی جاسکتی تھی، جانتی تھیں کہ ان میں سے بہت سے افراد اپنا نام بنانے کے لیے متعدد تنظیموں میں مشترکہ طور پر رکن بنے ہوئے تھے اور سرگرمیاں انجام دے رہے تھے۔

کچھ عرصے بعد، انہیں ’’دہقان اور کسان کا اتحاد‘‘ نامی ایک دفتر کے قیام میں امید کی ایک کرن نظر آئی جس میں اکثر افراد، ضلع جوانرود اور روانسر کے جوان تھے اور وہ لوگ ہورامان کے دہقانوں کے نام سے دن رات تشہیر میں مشغول رہتے تھے اور عوام کو دھوکہ دے رہے تھے۔ ان میں ہر سے ایک تحریک کی تاسیس اور دفاتر کا افتتاح درحقیقت بارود کا ایک ڈھیر تھا جو چنگاری کا انتظار کر رہا تھا تاکہ وہ لوگ، غریب قوم کو قربانی کا بکرا بنا سکیں۔

کمیونسٹ تنظیموں اور گروہوں کے ہنگامے کے برخلاف ہم نے ’’جمعیت طرفداران حکومت قرآن‘‘ کی تشکیل سے اپنے اہداف کا اعلان کیا کہ جو علاقے میں مسلمانوں کے اسلامی عقائد کا تحفظ، عوامی ثقافت اور قومیت کا دفاع، اور اسلامی عقائد اور اخلاق کے مخالف نوظہور مظاہر کا مقابلہ تھے۔ اس جمعیت میں رکنیت کی شرائط میں مسلمان ہونے کے علاوہ دوسری پارٹیوں میں عدم رکنیت تھی۔ اگرچہ ہمارے مخالفین، پرفریب اور کھوکھلے نعروں اور عام دھمکیوں کے ذریعے شہر کے جوانوں کی ایک تعداد کو اپنی طرف راغب کرنے میں کامیاب ہوگئے تھے، لیکن خدا کے لطف و کرم سے ہم اس حد تک کامیاب ہوگئے تھے کہ دس دن سے بھی کم عرصے میں شہر کے قریب آٹھ سو مردوں اور خواتین نے اس جمعیت میں شمولیت کے لیے رجسٹریشن کروا لی تھی۔

اس جمعیت میں بااثر اور فیصلے لینے والے چار لوگ تھے؛ تین مولانا؛ حقیر، ملا عبدالرحمن یعقوبی صاحب اور ملا ناصر سبحانی صاحب اور چوتھے ثقافتی کارکن علی محمد باباخاص[2]۔ ان اہم ترین فیصلوں میں سے ایک، ’النور‘ نامی ایک ماہ نامے کی اشاعت تھا جس کا پہلا شمارہ، مارچ 1979 کے وسط میں شائع ہوا اور بدقسمتی سے مالی مشکلات کے باعث، تین شماروں کے بعد ماہ نامے کی اشاعت کا کام رک گیا۔ اس رسالے میں ہم، انکشافی تجزیے پیش کر کے بائیں بازو کی جماعتوں کی حقیقت کو عوام پر آشکار کرتے تھے اور عوام کو بھلائی اور قرآن سے لگاو اور اعتقادی، سیاسی، اخلاقی اور اجتماعی میدانوں میں اترنے کی دعوت دیتے تھے۔