ایک گھر جتنی یونیورسٹی
سمیرا نفر
مترجم: ضمیر علی رضوی
2024-12-28
خزاں کے ایک روز ہم، شہید مصطفیٰ نمازی فرد کی والدہ کے گھر مہمان ہوئے؛ وہ گھر کہ جس کے ہر گوشے میں محبت، ایثار اور استقامت کی ایک کہانی پوشیدہ تھی۔ اس گھر میں ہماری ملاقات اس ماں سے ہوئی جس کا دل، صبر و تحمل کا دریا تھا۔ ان کا کلام، صبر و استقامت کی آیتیں تھا۔ وہ دھیمی لیکن احساسات سے بھرپور آواز میں پہلوی حکومت کے خلاف سیاسی جدوجہد اور مقابلے کے کٹھن دنوں کے بارے میں بتا رہی تھیں؛ ان دنوں کے بارے میں کہ جب ان کے چھوٹے بیٹے علی رضا کو ان کی آغوش سے چھین لیا گیا اور انہوں نے پھر کبھی اسے نہیں دیکھا، ان کا بڑا بیٹا اپنے مقدس مقاصد کی راہ میں زخمی ہوگیا اور مصطفیٰ نے خندہ پیشانی سے شہادت کا استقبال کیا۔ ان کا ہر لفظ اور ہر جملہ، انقلاب اور مسلط کردہ جنگ کے جوش و ولولے کے ساتھ ایران کی ایک الگ تصویر پیش کر رہا تھا۔ وہ، مصطفیٰ کے بارے میں بتا رہی تھیں؛ اس نوجوان کے بارے میں کہ جو امام خمینی(رہ) کے دیدار کے لیے تڑپتا رہتا تھا، اس کے یونیورسٹی سے محاذ پر جانے کے بارے میں، اس وعدے کے بارے میں جو اس نے اپنی ماں سے کیا تھا کہ اگر میں 25 دن تک واپس نہ آیا تو پھر مزید میرا انتظار نہ کیجیے گا، اس آخری الوداع کے بارے میں کہ جب ماں، اپنے کانپتے ہوئے ہاتھ اپنے بیٹے کے چہرے پر پھیر رہی تھی اور اسے دیکھنے کے ہر پل کو غنیمت جان رہی تھی، اسے دولہا بنانے کے ارمان کے بارے میں اور ان آنکھوں کے بارے میں جو آنسوؤں کا سمندر بن چکی تھیں، اس المناک دن کے بارے میں کہ جب برسوں کی جدائی کے بعد انہوں نے مصطفیٰ کے پاکیزہ جسد خاکی کو اپنی آغوش میں لیا، جسد خاکی نہیں بلکہ کچھ ہڈیوں کی ایک گٹھڑی۔ ان جملوں کو اس ماں کی زبان سے سننا کہ جس کے اپنے بیٹے کے لیے ہزاروں ارمان تھے، بہت سخت تھا؛ لیکن شہید مصطفیٰ نمازی فرد کی والدہ ایک مثالی صبر کے ساتھ اور اپنے نظریات پر قائم رہتے ہوئے، اپنے بیٹے کے نہ ہونے پر صبر کر رہی تھیں۔ گویا انہوں نے ایک چھوٹے سے گھر میں ایک بڑی یونیورسٹی قائم کی تھی؛ استقامت کی یونیورسٹی، ایثار کی یونیورسٹی اور عشق کی یونیورسٹی۔
وہ یونیورسٹی کہ جس میں انہوں نے ہمیں عظیم درس دیے: اس صبر کا درس جو مشکلات اور مصیبتوں کے سامنے مسکراتا ہے؛ اس ایثار کا درس جو وطن پر جان نثار کردیتا ہے؛ اور اس عشق کا درس جو انقلاب اور اپنے امام زمان(عج) کے لیے اپنا سب کچھ قربان کر دیتا ہے۔ شہید مصطفیٰ نمازی فرد کی والدہ سے ہماری ملاقات اپنے اختتام کو پہنچی۔ میں نے بغیر سوچے سمجھے آگے بڑھ کر انہیں گلے لگا لیا اور ان سے ہمارے لیے دعا کرنے کو کہا۔ پھر ملیں گے، اے عظیم خاتون!
oral-history.ir
صارفین کی تعداد: 114
http://oral-history.ir/?page=post&id=12299